إسمي صنعته بتوفيق من الله وتعبي
علاقتي ب( ابوي شيخ الٱمين ) علاقة طفلة تايهة لقت الامان ،، علاقه عميان ابصر الضوء ،،علاقة في الحقيقه ما بقدر اوصفها.
وبتمنى يكون عندي منافسين هنا سودانيين ندعم ونبهر بعض بطريقة غير مؤذية
بسبب نقائي ٱتأذيت من ناس كتيره ليها علاقه بالمجال وكنت في كل مرة بقع وبقوم .
ندرة المجال في السودان ما كان في حاجه اسمها (هير استايلست) بتعمل شغل براها ومتحكمة فيها الميكاب ارتست ، لحدي ما جات الحرب وساوت الكتوف وبقى مافي زول احسن من زول
الجنسيات الأخرى التي تعاملت معها كثيرة منها (نيجيريا ،، الجزائر ،، سوريا ،، الامارات ،، مصر ،، المغرب ،، ايران ،، فلسطين )
ملاذ عثمان خبيرة تسريح (هير استايلست) تمكنت من صناعة إسم لامع في هذا الجانب بالإمارات العربية المتحدة حتى باتت صوالينها قبله لمشاهير المجتمع السوداني غير الجنسيات الٱخرى من مختلف الدول العربية والٱسيوية في هذا الجانب جلست معها Khartoum daiLy في حوار منوع عن هذا المجال وندرته وسبب تٱخر بروزه كمجال منفصل فضلا عن جوانب ٱخرى متعلقة بها تطلعون عليها عبر هذه المساحة .
حوار … Khartoum daiLy
كيف بدٱت رحلتك مع عالم الاعتناء والتجميل ؟
من طفولتي و بحب الشعر بدٱت كعامله في كوافير كان وقتها عمري لم يتجاوز 16 عام كنت بشتغل واسيب الشغل وارجع تاني لحدي ما بديت شغلي براي في العام 2021 ودي كانت نقطة البداية الحقيقية
لماذا ركزتي اكثر على التسريح ؟
هو شغفي من انا صغيره ،، كنت بسرح لنفسي في عمر صغير شديد بسبب مرض الوالده الله يرحمها بدا حبي للشعر يزيد كنت بسرح لحبوباتي وبمشط بنات اهلي وبعد ما كبرت لقيت انو دا المكان الوحيد البحس فيه بالموهبة والمتعة وٱعرف اني ملاذ .
عندك منافسين في شغل التسريح وسط السودانيين لندرة القسم دا من العناية والجمال ؟
ايوه عندي منافسين سودانيين خارج الدولة ،، وبتمنى يكون عندي منافسين هنا سودانيين ندعم بعض ونحاول نبهر بعض بطريقه غير مؤذيه وزي ما بقولو البغر ولا الحسد
ملامح خطتك التي إستطعتي عبرها صناعةإسمك حتى حدثت الثقة والإنتشار ؟
توفيق من الله وفضل ،، وحتى شغلي دا هبة من الله لي
ٱبرز الشخصيات العامة التي تعاملتي معها
كثير من الشخصيات العامة والمعروفة
لماذا هذا المجال قليل مقارنة بوسائل العناية الأخرى ؟
في السودان ما كان في حاجه اسمها هير استايلست بتعمل شغل براها وكدا كان اسمها كوفيرة ومضغوطه في مكان واحد ومتحكمة فيها الميكاب ارتست وحتى ما بتديها مساحتها بالفن حقها ،، السنين الاخيرة طلع جيل متمرد بحاول يقوي الشخصيه دي وصراحة كان صراع صعب لحدي ما جات الحرب وساوت الكتوف وبقى ماف زول احسن من زول واي زول بلقى حسب نيته واجتهاده وسوق مفتوح شديد والمنافسة فيو عادلة
هل لديك أي داعم روحي ساهم في ثباتك وعزز ثقة نجاحاتك ؟
ابوي الشيخ الامين هو الداعم الاول وكان الداعم الوحيد في بداية مسيرتي وما بنكر فضل الاخوان والاصحاب في السنين الاخيرة بس الشيخ هو الركن الاساسي في تطويري في ظل الظروف حتى تمكنت من تحقيق كل هذا النجاح.
لديك علاقة خاصة مرتبطة بٱبونا الشيخ الامين احكي عنها ؟
علاقتي بابوي الشيخ هي علاقه طفلة تايهة لقت الامان ،، علاقه عميان ابصر الضوء ،،علاقه في الحقيقه انا ما بقدر اوصفها غير اني كنت ضايعه لحدي ما لقيت الطريق من لطف الله علي ان جعل ابوي الشيخ سنداً وظهراً وزاداً للمشاوير .
الجنسيات التي تعاملتي معها خلاف السودانيين ؟
نيجيريا ،، الجزائر ،، سوريا ،، الامارات ،، مصر ،، المغرب ،، ايران ،، فلسطين
هذا السوق متطور
خطتك القادمة لتطوير هذا المجال بشكل أكبر
الخطط مستمرة ومتغيرة ما دمت في المجال .
كيف كانت معاناتك معه
في بداية مسيرتي كنت نقيه شديد اتأذيت من ناس كتيره ليها علاقه بالمجال في كل مره بتأذي فيها بتقوقع ع نفسي شهور كتيره وتاني برجع ،، اخدت زمن طويل شديد عشان اعرف اتعامل مع نفاق العالم
معروف ان هذه الحرب قامت بتصفير العداد ماتعليقك ؟
انا في كل مكان وكل ظرف راضية تماما عن ٱقدار الله وعن نفسي رضى مطلق ،اجتهد اني امشي للاحسن لكن بلطف علي نفسي من دون قسوة عليها ،، فخورة بنفسي وواثقه.
